Arnap ataatassaminik toqutsisup tigummigallarneqarnera sivitsorpoq
Arnaq ataatassaminik toqutsisuulluni nassuereeraluartoq, inuup sananeqaataanut ilisarnaatitut takussutissanik DNA-nik misissugassatut Danmarkimut nassuissat inerneri suli utaqqineqarput.
- Misissuinerit inerneri eqqartuussinissami uppernarsaatitut pisariaqarmata arnap tigummigallarneqarnera sapaatip-akunnerinik sisamanik sivitsorneqarpoq, taama Nanortalimmi politeeqarfiup pisortaa Michael Poulsen oqarpoq.
Aamma Nanortalimmi angutip 43-nik ukiullip tigummigallagaanera sapaatip-akunnerinik sisamanik sivitsorneqarpoq. Angut taanna Alluitsup Paani arnamik 22-nik ukiulimmik januaari naalersoq pinngitsaaliivoq, eqqartuussaalerpalli uppernarsaatissatut saqqummiussassat ilaat suli utaqqineqarmata tigummigallagaanera sivitsorneqartoq, Michael Poulsen ilisimatitsivoq.
