Arnap 55-inik ukiullip Sisimiuni savimmik kapineqarnini toqqutigigaa

Arnap Sisimiuni savimmik kapineqarnermi kingorna toquvoq. Inuk ataaseq tigusarineqarpoq.

Kalaallit Nunaanni Politiit tusagassiuutinut taama nalunaarput.

Kalaallit Nunaanni politiit pingasunngornermi februaarip arfineq pingajuanni nalunaaqutaq 20.56 nalunaarfigineqarput, arnaq Sisimiuni savimmik kapineqarsimasoq. Arnaq napparsimmavimmut nukingiunneqarpoq, inuunerani annaanneqarsinnaasimanngilaq, nalunaaqutarlu 21.30 toqusutut nalunaarutigineqarpoq.

Politiit arnaq 25-nik ukiulik, savimmik kapisisutut pasisaasoq nalunaaqutaq 22.20 tigusaraat. Taanna Qeqqata eqqartuussiveqarfianut sisamaanngornermi sassartinneqassaaq.

Toqusup qanigisai kaleqqinneqareerput.

Politiit allamik maannakkumuugallartoq paasissutissaateqanngillat.

Nuummi Qaqortumilu toqutsineq

Politiit ullut qulit ingerlanerinnaanni toqutsinernik suliaasa pingajussaraat.

Inuit marlunnik sapaatit akunnerata ingerlanerinnaani toqutsisoqarpoq – 82-inik ukiulik arnaq, Nuummi najukkamini januaarip 31-ani toqungasoq nassaarineqarpoq, 53-inik ukiulik angut Qaqortumi najugaqarfimmini arfininngormat toqungasoq nassaarineqarpoq. Angutip suna toqqutigisimaneraa paasiniarlugu misissorneqarnerani paasineqarpoq nalinginnaanngitsumik toqquteqarsimasoq. Taamaammat politiit toqutsinertut misissuineq aallartippaat.

Angut Qaqortumi najugaqarfimmini J. H. Lytzensvejimi toqungasoq nassaarineqarpoq.

AAMMA ATUARUK Politiit Qaqortumi pasinartumik toqusoqarnera toqutsisoqarneratut misissuiffigigaat

Politiit oqarnerat naapertorlugu angutip piffissaq toquffigisaa erseqqissumik maanna oqaatigineqarsinnaanngilaq, toqutsinerli februaarip pingajuanni tallimanngornerup ualikkuaniit arfininngornerup februaarip sisamaata ullaavata akornanni pisimassangatinneqarpoq.

Suliamut tassunga tunngatillugu politiit suli tigusarinninngillat.

Niaqqukkut anaalerlugu toqutaasoq

Toqutsinermut atatillugu Nuummi angut 30-nik ukiulik ulluni pingasunik tigummigallarneqarpoq. Taanna arfininngornermi iparagaaqqippoq, pisumulli suli pasineqarluni. Nuummi toqutsisimasumik suli maannamut tigusarinnittoqanngilaq.

Arnaq 82-inik ukiulik niaqqumigut oqimaatsumik arlaleriarlugu anaalerneqarsimasoq, pinerluttullu inissiaq nalilinnik ujaasiffigeriarlugu ikuallatsissimagaa, politiit ilanngullugu paasissutissiissutigaat.