Arlaleriaammik pissartaq nersornaaserpaat
Pisarneq malillugu Kunngit pingasut ulluanni Nuummi timersullammannik toqqaasoqarpoq immikkoortunilu arlalinni toqqaasoqarpoq.
Nersornaatinik tunniussuinissaq sioqqullugu nipilersortunik erinarsortunillu aliikkusersuisoqarpoq ilaatigut Mike Thomsen, Hinnarik aamma Frederik Elsner kiisalu KNRip erinarsoqatigiivi Qupannavaat erinarsormata. Nuup illoqarfiani nipilersortartut aamma nipilersorput.
Nersornaasinerlu pivoq. Tassani timersullammattut toqqarneqarpoq Arctic Sportsimi unammisartoq Bent Jakobsen nunatsinni pissartanngorniunnerni aamma Arctic Winter Gamesimi angusarissaarnini pillugu toqqarneqartoq. Ilulissani GM-qarmat arfineq pingasunik kultinnappoq ataatsimillu sølvinnalluni. Whitehorsemi Arctic Winter Gameseqarmat ataatsimik sølvinnallunilu ataatsimik bronzennappoq.
- Bent inuttut nukittunermini unamminerni ilungersunartoqaraluartoq, timersortartorpalaarneq imminuinnarlu eqqarsaatiginnginneq atugariuarlugit unammeqatimi angusaqarluarnissaannut ikiuuttuarpoq, aamma nammineq inissilluarnissani ulorianartorsioraluarpalluunniit – tamakku pinnguaatitoqaatitta tamanut iluaqutaasussamik qaffassarluarnissaannut iluaqutaapput, Kommuneqarfik Sermersooq tunngavilersuummini allappoq.
Sungiusaallammattut toqqarneqarpoq B-67ip arsaattartuineersoq Tekle Ghebrelul B-67ip inuusuttai inersimasortaalu peqatigalugit aasaq pissartanngortitseqataasoq.
- Sivikikkaluartumik B-67-imiinnermini inuppassuarnut sunniuteqarluarsimavoq. Eqqarsartariaaseq allanngortinniarsimavaa timersortartunut, ataqatigiinnermullu suliniuteqarluni, Kommuneqarfik Sermersooq tunngavilersuummini allappoq.
Siulersuillammattut Allan Eriksen GSS-meersoq toqqarneqarpoq timersortartutut unammisartuujunnaarnermi kingorna peqatigiiffilerinermi sulilluarsimanera pillugu. Ukiut 25-it kingulliit GSSip assammik arsartartuini suleqataasimavoq.
Neriunaateqarluartumut nersornaat naluttartumut Mia Biilmann Larsenimut tunniunneqarpoq. Taanna sapaatip akunneranut minnerpaamik pingasoriarluni sungiusartarpoq maannamullu Islandimi Danmarkimilu unammeqatareersimalluni. Speedo Cup Danmarkimi pimmat unamminermini tamatigut finalemut annguttarpoq sølvimillu ataatsimi angerlaassilluni.
Ukiup iligiivinut nersornaat naluttartoqatigiinnut Nanoq-mut tunniunneqarpoq angusatik timersuumminnullu tunniusimanertik pillugu.
- Nanoq-holdi ataatsimoorfiulluinnartuuvoq, ikinngutigiiffiulluni ukiut nikinganerat naluttarfimmilu piginnaasat apeqqutaatinnagit ataqatigiiffiulluni. Ataatsimoorneq annertuumik kajumissaataavoq sungiusariarfinni sungiusariarnernilu nuannisartarnermut, Kommuneqarfik Sermersooq.
Timersortartut ulluanni aamma kajumissaasiisoqarpoq timersoqatigiiffimmut sullissilluartunut tunniunneqartartumik. Taamatut kajumissaaserneqarput aappariit Joseph Malby aamma Ruth Lindhardt Nuuk Shotokan Karate-Do-mi ukiorpassuarni suleqataasimasut.
