Arla, tunisassioqqilerpoq

Arlap immunnit tunisassiai Saudi-Arabiami tuniniarneqaqqilerput. Taamaattorli Muuamaat ilaarlugu titartakkat takkutinngikkallarnerisut tuniniaaneq ingerlaqqilissappat Arlap arnat atuisut toqqaannartumik oqaloqatigisariaqarai, atuisunut misissueqqissaartartut ilaat nuimasoq, Saudi-Arabiamiut atuisut pissusaannik malinnaaqqissaartoq isumaqarpoq.

Saudi-Arabiami nerisassanik niuerniartartut amerlanertigut tassaasarput arnat. Taakkualu aqqutissaapput danskit immunnit tunisassiaat tunisaaneruleqqissappata. Taama oqarpoq Saudi-Arabiamiut atuisut pissusaannik ilisimasalik.

Soorlu Saudi-Arabiami Arla aviisimik saqqummersitsisimavoq, tassani oqaluttuarineqarluni Arlap Muuamaat ilaarlugu titartakkat tapersersunngilluinnarai. Kisianni Saudi-Arabiamiut arnartaat amerlanerit aviisinik atuarneq ajorput, radio tusarnaanngikkaangamikku tv isiginnaarumanerusaramikku. Taamaalilluni Saudi-Arabiami arnat pingajorarterutaannaasa Arlap paasisitsiniutai takusimassavaat.

Arla pissarsinerussagaluarpoq arnat toqqarlugit oqaloqatigigaluarunigit. Arnammi amerlasuut Arlap tunisassiaannik iluarisaqartuupput.

Saudi-Arabiami oqaaseq Danmark tusaasunit kamaammertitsisarpoq, kisianni tunisassiat pitsaassusaat arnanut toqqaannartumik oqaluttuarineqarpat tamanna periarfissarissaarpoq, atuisunik ilisimasalik isumaqarpoq.

Danskit tunisassiaannik pisiumajunnaarnerup kingorna atuisartut tunisassianut allanut nuussimapput. Taamaattorli oqaatigineqarpoq soorlu punnermik tuniniaanermi Arla pingaarutilimmik unammillerteqanngitsoq. Taamaattumik Arlap tunisassiai ukioq ataaseq qaangiuppat Saudi-Arabiami tamakkiisumik tunisaaqqilernissaat ilimagineqarpoq.