Arkalo Abelsenip naalakkersuisutut tunuarnissaa Atassutip nammineq piumasarisimavaa

- Akisussaaffiit angisoorujorujussuupput taakku marluk, immikkoortikkaluaraanniluunniit immikkut naalakkersuisuleraluaraanniluunniit tamarmik akisussaaffiit angisoorujussuupput. Taamaakkaluartoq ataatsimut kattunneqarput. Taannas siullermik siornaakkunnili kattunniarneqalermat Atassumminngaanniit isumaqatiginikuunngilarput akisussaaffiit annertoqimmata, Finn Karlsen oqarpoq, nangillunilu.

- Taamaattumik massakkut taama oqartoqassappat isumaqatigilluinnarpakka, akisussaaffiit inunnik sullissisut annertoorujorujussuupput taakku akisussaaffiit marluk immikkoortut ataatsimut kattunneqarnerat.

Taava qanoq kajumissaaruteqarniarpit?

- Isumaqarpunga siunissami inastsisartunut qinersisoqareerpat naalakkersuisunik inissitsiterinissami eqqarsaatigeqqissaartariaqartoq ilumut taakku attanneqassanersut. Tassami massakkumut naalakkersuisuusartut ataaserluunniit naalakkersuisuuffik ingerlannikuunngilaa. Tamatigut ajoquteqartumik qarsupittuugaqartuartarput tupinnanngitsumik. Suliassarparpassuaqarpoq takanani immikkoortut marluk taakku eqqarsaatigalugit.

Ippassaq ataatsimiinnermi ilaatigut saqqummerput Inuit Ataqatigit Kattusseqatigiit Demokraatillu tatiginninnginnermik takutitsiniarlutik ataatsimiinneq unitsimmassuk. Taamatut tatiginninnginnermik takutitsinerat Atassummut sunniuteqarpa?

- Tassa soorunami sunniutai takoreerparput, ajoraluartumik naalakkersuisumik tunuartoqarpoq, tassa sunniuteqarpoq taamannak. Kisianni tassa taamatut tatiginnikkunnaarnermik saqqummertoqarmat soorunami pisarnertut uagut gruppetsinni oqallisigivarput. Naalakkersuisut tamatta assigiimmik naalakkersuisumut akisussaaffimmik malittarisassaqarpugut inatsimmik. Taakkulu misissorneqarneranni allatut ajornartumik ajuusaarnaraluaqisumik inatsisinik malinneqqissaarneq ingerlasimanngilaq. Taanna toqqorterneqarsinnaanngimmat uagullu partiiulluta ileqqorissaarnermik ingerlataqartuulluta, taamaattumik uagutsinniinnera pillugu oqallisigigatsigu allatut ajornartumik naalakkersuisuutitarput kajumissaarparput nammineerluni tunuarniuteqarnissaanik, taannalu akueraa, Atassutip siulittaasua Finn Karlsen oqarpoq.