Arkalo Abelsenip Karen Jespersen ataatsimeeqatigissavaa

Ataatsimiinnermi isumaqatigiissutinik pioreersunik nutaanilluunniit isumaqatigiissuteqartoqassanersoq Ark’alo Abelsen isumaqatigiissutaasinnaasunik katersileruttorpoq. Ukiut marluk matuma siornatigut, taamanikkut isumaginninermik naalakkersuisuusut, Aleqa Hammond aamma Eva Kjer Hansen, suleqatigiinnissamik isumaqatigiissuteqarput, ilaatigut oqartussaaffiit ineriartortinneqarnissaat pillugu, sulisut paarlaateqatigiittarnissaannik taavalu atuartitsinermi atortunik ilinniaqqinissamillu pilersaarutit pillugit. Ilaqutariinnermut naalakersuisup Arkalo Abelsenip Danmarkimi ataatsimiinnera iluatsillugu, isumaginninnermut suliat pillugit ataqatigiissitaliaq, Kalaallit Nunannit Danmarkimiillu ilaasortaatitaqartoq, ataatsimiissaaq. Ataqatigiissitaq ataatsimiinnermini meeqqanik sumiginnaasarneq pinaveersartinniarlugu suliniutit nalilersussavaat. Ataqatigiissitaliami Kalallit Nunaannit ilaasortaavoq Ilaqutariinnermut Pisortaqarfimmi pisortaq, Martha Lund Olsen.