Ark'alo Abelsen Tasiilalialerpoq

Ark’alo Abelsen naalakkersuisut ‘suligasuartussatut pilersitaannut’ ingerlatsisuuvoq.

Atorfilittani peqatigalugit Tasiilami qinikkanik aallaqqaataaniit suleqateqarnissaq qulakkeerniarlugu naalakkersuisunut ilaasortaq Tasiilaliassaaq, tamanna pissalluni Naalakkersuisup, Tasiilamilu borgmesterip, Vittus Mikaelsenip isumaqatigiissuteqarnerisigut.

- Tasiilami oqartussaasut peqatigilluinnarlugit aaqqiissutissanik ujartueqatigiissaagut. Suleriaqqinnissamilu suut pingaarnerutillugit sulisoqarnissaa tappavani innuttaasut peqatigilluinnarlugit pisariaqassaaq, Ark’alo Abelsen oqarpoq.

Naalakkersuisut pingaartippaat Tasiilamut tunngatillugu ingerlariaqqinnissami piffissaq qaninnerusoq ungasinnerusorlu eqqarsaatigalugit iliuuseqartoqartariaqartoq.

Ataatsimiititaliami suligasuartussami pilersinneqartumi Kangia-Kitaata Ikaarsaariarnermut ataatsimiititaliaanit peqataasoqarnissaa aamma qulakkeerniarneqarpoq.