Silap allanngoriartornera nunarsuatsinnut ajornartorsiutaavoq, nunattalu tamanna isiginngitsuusaaginnarsinnaanngilaa.
Peqqissutsimut avatangiisinullu naalakkersuisoq Arkalo Abelsen taama oqarpoq.
”Nunarsuaq tamakkerlugu avatangiisit ulluat 2007” qulequtaralugu Naalagaaffiit Peqatigiit Norgemi ataatsimeersuartitseqqammerpoq, Arkalo Abelsenilu nunarput sinnerlugu ataatsimeersuariaqataavoq.
Silap allanngoriartornera nunarsuatsinnut ajornartorsiutaasoq ataatsimeersuarnerup inerneraa, nunallu tamat akornanni ajornartorsiut qaangerniarlugu iliuuseqartoqartariaqartoq, nunattalu tamanna isiginngitsuusaaginnarsinnaanngikkaa Arkalo Abelsen oqarpoq.
- Gassit ingerlaatit Kalaallit Nunaannit pisut, Siberiamit, Europamiit USA-miillu pisut assigalugit ozonimut ajoqusiisarput. Tamatumalu ilorraap tungaanut iliuuseqarfiginissaa pingaaruteqarpoq, tassa CO2-mik aniatitsinerup kingunerisaanik silaannaap mingutsinneqarnera millisarniassagutsigu innaallagissamik atuinerup millisarnissaanut paasisitsiniaasoqartariaqarpoq, aammalu erngup nukinganik innaallagialiorfiliornertigut millisarneqarsinnaaavoq, Arkalo Abelsen tusagassiuutinut nalunaarummi allappoq, nangillunilu:
- Silap pissusaata allanngoriartornerata nunarput nunanut eqqaamiutsinnut ilorraap tungaanut suliniuteqarnitsigut qaninnerulersissinnaavaa, pingaaruteqarporlu nunarsuarmi avatangiisitta nunatta sermersuata aakkiartorneranut paasinnilersitsiniarluta avatangiisigut ilisimatusarnikkut paasissutaasinnaasunik misissuinissaannut periarfissikkutsigit, Arkalo Abelsen
naggasiilluni oqarpoq.
