Arkalo Abelsen Peqqissutsimut Avatangiisinullu Naalakkersuisunngorpoq

Arkalo Abelsen Peqqissutsimut Avatangiisinullu Naalakkersuisunngorpoq

Siumut Atassutillu naalakkersuisooqatigiilerneranni Naalakkersuisuni nutaartaasut marluk aappaat tassaavoq Atassummeersoq Arkalo Abelsen. Taassuma Inuit Ataqatigiinneersoq Agathe Fontain Peqqissutsimut Avatangiisinullu Naalakkersuisutut taarserpaa. Arakalo Abelsen siornagut Ilinniartitaanermut Kultureqarnermut, Ilisimatusarnermut Ilageeqarnermullu aamma naalakkersuisuusimasoq, aperaarput Peqqissutsimut Avatangiisinullu Naalakkersuisunngornermini suut pingaartillugut suliassamisut isiginerai, akivorlu:

-Assigiinngitsut ingerlareersut pullavigeqqissaassavakka. Isumaqarpunga naalakkersuisuusarsimasut kingulliit siunniussaat-innuttaasut qanimut suleqatigalugit- pinaveersaartitsinerlu assut pingaartillugu suliniutaat iluatinnartorujussuit tamanillu tapersersornartut, taakkua ingerlassapput.

Nunatsinni napparsimalertartut sapinngisamik ikinnerpaatinniarsarinissaat ungasinnerusoq eqqarsaatigalugu Arkalo Abelsenip sulissutigiumavaa.

-Aningaasat amerlanerujartortut sinerissami inuit tikillugit peqqinnerunissaq eqqarsaatigalugu suliniutinut assigiinngitsunut paasisitsiniaanernullu atorneqassapput.

- Isumaqarpunga qitiutittorujuussallugu meeqqat mikerminniik sungiutissavaat imminnut timikkut anersaakkullu paarilluarnissartik. Tassalu taanna siunissami aningaasartuutissarpasuusinnaasut millisarnissaannut aqqutissatuaasoq.

Avatangiisinut tunngasuni aluminiuliorfissap avatangiisinut mingutsitsisumik ingerlanneqannginnissaata qulakkeerneqarnissaa, tamatumalu saniatigut illoqarfiit ikuallaaveqanngitsut eqqarsaatigalugit kommunet suleqatigalugit nunatta minguitsuutinnissaa anguniassagitsik Arkalo Abelsen oqarpoq.

Suleqatigiinnissamut qanoq piareersimatiginersoq aperigatsinni akivoq:

- Sulinissannut piareersimasorujussuuvunga. Qularineqassanngilaq pissuserisorujusuugakku unneqqarilluinnartumik paasissutissanik tunioraaneq- aammami toqqorterinissamut pissutissaqannginnami- taanna matuersaataassooq illuatungiliuttut aamma suleqatigilluarnissaannut- ammaffigisorujussuussavakka.