Arfiviit sisamat pisarineqarsinnaassapput
Kalaallit Nunaata arfiviit 2008-miit 2012 ilanngullugu ukiumut marluk pisarisinnaagai Arfanniarneq pillugu ataatsimiititaliarsuarmi siorna ataatsimiittoqarmat aalajangiunneqarpoq.
Arferit annerit illersorneqarnissaat pillugu nalunaarusiaq nutaaq naalakkersuisunit siorna isumaqatigiissutigineqarpoq. Arferit annerit pisaat pissatallu pillugit nalunaartussaatitaaneq pillugu nalunaarusiaq aamma isumaqatigiissutigineqarpoq. Nalunaarusiat apriilip 17-iani ilisimatitsissutigineqarput, 18-ianinngaanniillu atuutilerlutik.
Arfivinnik pisaqarniaraanni tikaagulliusaat pisarineqartarnerattut pisarineqartassapput, assigiinngissutaali tassaavoq angallatit marluusariaqarmata, tamarmillu minnerpaamik 36 fodiusariaqarlutik.
Qamutilissorluni arfivinniartoqartassaaq, qamutiliullu sulloqqortussusaa minnerpaamik 50 millimeteriussaaq, tuukkartaalu qaartartulerneqarsimassalluni.
Angallatit aalajangersimasut arfivinniarsinnaatitaassapput, Qeqertarsuullu Tunuani arfivinniartoqarsinnaassalluni.
Aalisarnermut, piniarnermut nunalerinermullu Aqutsisoqarfik kiisalu KNAPK suleqatigiillutik arfivinniartitsissapput, apriilip aallaqqaataaniit decembarip 31-ata tungaanut arfivinniartoqarsinnaalluni.
Tikaagullinniarnermut atatillugu angallatit angissusissaat nalunaarusiatigut aamma aalajangerneqarpoq. Nalunaarusiaq siuliani atuuttoq naapertorlugu angallatit 70 fodit ataassimasussaavaat, nalunaarusiarli nutaaq naapertorlugu angallatit 30 aamma 70 fodit akornanni angissuseqassapput.
