Arferup neqaanik tuniniaasarneq WSPA-mit saassunneqarpoq
Uumasunik illersuiniaqatigiiffik ingasaassiniartoq ilaatigut isertortumik assiliineq atorlugu kalaallit pisiniarfiini "misissuisimavoq".
WSPA-mit aamma oqaatigineqarpoq, arferup neqaa 15 tonsinik oqimaassuseqartoq ukiunilu kingullerni marlunni pisarineqarsimaneragaasoq, suli tunineqarsimanngitsoq unnerlugu.
- Misissuinitsigut paasivarput, pisiniarfissuit qerititsivii arferit neqaannik arfernillu pisunit ulikkaartut taakkulu ukioq 2006-imili uninngasuutigineqarsimasut, WSPA nalunaarusiamini taamak allaaserisaqarpoq.
Nunat inoqqaavi namminneq pissaminnik arfanniarsinnaanerat Nunat tamat arfanniarneq pillugu ataatsimiititalilarsuata, IWC-ip, 1986-imi atuutsilersippaa. WSPA malillugu kalaallit ukiumut 233-nik arfattassinneqarnikuupput.
Kalaallit Nunaani pisiniarfiit, ritzauip allaaserisaa malillugu supermaked-it, arferit neqaannik tuniniaasinnaatitaapput, innutaasunulli taamaallaat tuniniarneqarnissaa IWC-imit kajumissaarutigineqarluni.
- Nunat tamat arfanniarneq pillugu ataatsimiititaliarsua IWC-p oqarnera malillugu, nunat allamiut, Kalaallit Nunaanni niivertarfissuarni supermarked-ini 100-inik sinneqartuni arferit neqaannik pisisinnaapput, erseqqissaatigalugulu Kalaallit Nunaat amerlanerusunik arfernik pisaqartarnissaminik qinnuteqarluni misiliisoq.
- Nunat tamat arfanniarneq pillugu ataatsimiititaliarsua IWC Chile-mi sapaatip akunnerata tulliani ataatsimiinnerani uumasunik illersuiniaqatigiit WSPAp "nalunaarusiani" saqqummiuppagu kalaallit qaamasumik amillit imaluunniit danskit "nunami allamiutut" taagorneqarnersut filmip takutissaneraa paasinarsissaaq.
