Arferup neqaanik annissinissamut eqqussinissamullu piumasaqaatit eqqortinneqarsimanngitsut

Arferup neqaa pineqartoq Københavnimi Tranhusimut, tassalu qanga arferup neqaanik qalaasarfiusimasumut ingerlasuugaluartoq, maanna Aalborgip umiarsualiviani uninngatinneqarpoq.

- Ukiup kingulliup naalernerani januaarillu aallartinnerani, nassiussat kimukarnerinik nalusatta tikinnerini paasivarput arferup neqerigai. Misissoqqissaarnerinilu paasivarput, Kalaallit Nunaannit annissinissamut akuersissummik aammalu Danmarkimut eqqunneqarnissaannut Skov & Naturstyrelsemit akuersissummik pisoqarsimanngitsoq. Taakkulu CITES-ip uumasut nungutaanngujoortut illersorneqarnissaat pillugu maleruagassai malillugit eqqortinneqartussaapput, tassalu eqqussuinermi annissuinermilu malitassat malinneqarsimanngillat, Mogens Jørgensen oqarpoq.

Tamatumuma kingunerisaanik Told & Skatip Skov & Naturstyrelsillu pisoq politiinut nalunaarutigisariaqarsimavaat.

- KNI Pilersuisup tuniniaanermut pisortaata, Kurt Lauritsenip pisumi kukkussuteqarsimanertik nassuerutigaa:

- KNI-muna maleruagassanik misissuilluarsimannginneranik tamanna pissuteqartoq.

Ukioq kingulleq aviisitigut paasivarput aallartitaqarfimmi sulinermi najoqqutassat malillugit, maanna kalaaliminernik Danmarkimut nassitsisoqarsinnaalersoq. Misissuereerlutalu paasivarput inunnut ataasiakkaanut 5 kiilu angullugu pisiassanik nassitisinnaalluta. Kisiannili paasinarsivoq arferup neqaanik nassitsissagutta CITES-ip maleruagassai malittussaallugit. Tamatuma kingunerisaanik Namminersornerullutik Oqartussat januaarimi ataatsimeeqatigalugit maleruagassat misissoqqissaarpavut, tassanilu taama nassitsiniarnermi sorpiaat piumasaqaataanersut erseqqissarneqarpoq.

-Taamaalilluta paaseqatigiiffiusumik oqaloqatigiippugut, Kurt Lauritsen oqarpoq.

Arferup neqaa 900 kiilu utertinneqassanersoq imaluunniit igiinnarneqassanersoq suli aalajangerneqanngilaq.