Arferit pillugit tamaviaarput
Aaqqiagiinnginneq marlunngormat aallartippoq, tassa uumasunik illersuiniaqatigiinnut ilaasortat marluk umiarsuarmut arfanniummut ikimmata, tassami uumasunik illersuiniaqatigiit isumaat naapertorlugu unioqqutitsisumik arfanniartoqarmat.
Uumasunik illersuiniaqatigiit taakku marluk Japanimiunit arfanniummut inuttaasunit tigummineqarput, aatsaallu Sea Shepherdip akornusersorunnaarpatik iperarumallugit. Tamanna Sea Shepherdip naalagaata akueriumanngilaa, arfanniutillu ikkivigineqarnissaa qunusaarutigalugu.
Tamanna pissutigalugu Australiamiut naalakkersuisui aaqqiagiinngissuteqartunut akunnermiliupput angallammillu attartorlutik uumasunik illersuiniartut taakku arfannianit tigusaaqqasut aallugit.
Maanna Japanimiut arfanniarnertik nangeqqissinnaanngorpaat, uumasunillu illersuiniaqatigiit akornusersuinertik qularnanngitsumik aamma nangeqqissallugu.
Arfanniarnerup apriilimi taamaatinneqarnissaata tungaanut Japanimiut ilisimatusaatigalugu arfanniarnermik taasaminni tikaagulliit 900-t tikaagulliusaallu 50-it pisarinissaat pilersaarutigaat.
Nunat arlallit avatangiisinillu illersuiniaqatigiit arlallit arfanniarnerup ilisimatusaatigalugu arfanniarnermik taaneqarnera arfanniarnissamut utoqqatsissutaannaanerarlugu oqaatigaat.
