Arferit pillugit atuakkiaq nutaaq
Arferit ukiuunerani nunatsinniittartut pillugit atuagaq nutaaq saqqummersinneqarpoq, ippassarlu Pinngortitaleriffimmi pingaartorsiornartumik ilasseqatigiissutigineqarluni.
Atuagaq kalaallisut, qallunaatut, tuluttullu saqqummersinneqarpoq, atuartitsinermilu atorneqarsinnaanera eqqarsaataavoq.
Atuakkioqataasoq ilisimatooq Mads Peter Heide Jørgensen oqaloqatigineqarpoq.
Arferit pingasut misissuiffigisavut pillugit atuakkamik saqqummersitsivugut. Misissuinitsinni paasisavut katersoriarlugit atuaganngortippavut. Paasisavut ukiut 25-t ingerlaneranni misissuinitsigut paasisaraavut. Tassani pineqarput arferit pingasut ukioq naallugu nunatsinniittartut, tassa ukioq naallugu issittuniittartut. Taamaattumik taavavut ukiup arferi. Tassaasut qilalugaq qaqortaq, qilalugaq qernertaq aamma arfivik. Tassami arferit ilaat, soorlu tikaagulliit, tikaagulliusaat, qipoqqaallu aasakkuinnaq nunatsinni tikeraartigisaratsigik.
- Arferimmi taakkua 2006-imi qanoq ippat peqqissuuppat?
Arferit peqqissutsimikkut akornuteqanngikkaluarput, amerlassusaalli ikiliartorput. Soorlu qilalukkat qaqortat qernertallu nunatsinni ikiliartorput. Tassami 1920-30-ikkunni piniarneqartarsimaqaat, soorlu Nuup eqqaani piniarneqartarsimapput. Aammattaaq soorlu 1994-95-ikkunni piniagaasorujussuupput, taamaattumillu killilersugaalernissaat siunnersuutigaarput, amerliartoqqilerniassammata.
Arfivik tassaavoq nunarsuarmi uumasut eqqissisitaasut siullersaat, tassami 1932-mi nunarsuaq tamakkerlugu eqqissisimatitaalerpoq. Nalunngilarput aningaasarsiutigalugu arfanniartoqartarallarmat piniagaasorujussuusimasoq. Ullumikkut aamma nalunngilarput nunatsinni arfiviit amerliartormata.
- Killilersuisoqarnerata kinguneranik qilalukkanik qaqortanillu soorlu Nuup eqqaani takusalissanerluta?
Amerliartoqqilissappata taamaalluarsinnaavoq, tassami qilalukkat qaqortat qangaanerusoq kujammut Qaqortoq tikillugu uumasuusimagaluarmata. Qilalukkanik qernertanik Nuup eqqaani takunissarput ilimagissanngilarput, taakkumi itisoormiuupput sermersuullu immamut ataffigisaata eqqaaniinnerusarlutik.
- Atuagaq 3000-inngorlugu saqqummersipparsi kikkunukua atuassagaat?
Neriuppugut nunatsinni siammarluarumaartoq, tassa kalaallisut, qallunaatut tuluttullu saqqummerpoq, taamaalilluta aamma neriuutigaarput takornariat soqutiginnittullu allat atuarumaaraat. Aamma neriuutigaarput, soorlu qilalukkat pillugit oqallinnermut tapertaasinnaajumaartoq, ilisimatooq Mads Peter Heide Jørgensen oqarpoq.
