Arferit EU-mi oqallisigilerpaat
Aningaasarsiutigalugu arfanniartarnermut danskit nunanit EU-mut ilaasortaasunit 27-sunit kisiartaallutik tapersersuinerat nunanit EU-mut ilaasortaasunit allanit assut isorineqarpoq, danskillu EU-mut ilaasortaaqatigisaminnut sumiginnaasutut allaat uparuarneqartut, avisimi Politikenimi aallaaserineqarpoq.
- Assut pakatsisinneqarpugut, EU-mi avatangiisinut kommissæri Stavros Dimas aamma aalisarnermut kommissæri Joe Borg allapput.
Arferit nungutaanngujoortutut illersorneqartariaqartutullu kiisalu tuukkanik qaartartortalinnik atortoqarluni arfanniariaaseq uumasunik naalliutsitsinertut EU-mit isigineqarpoq.
Aningaasannanniutigalugu arfanniartarneq 1986-imili inerteqqutaalerpoq, upernassarlu qallunaanik isumasiuinerup takutippaa qallunaat 64 procentii aningaasannanniutigalugu arfanniartaleqqinnissamut akerliusut, Politikenimi allaaserineqarpoq.
