Arferit akornutaaginnanngillat

Radioaviisimi ippassaq aallakaatinneqartumi aalisartoq Marius Olsen apersorneqarnermini ilaatigut oqarpoq

arferit uumasutut illernartuutitatut isigiunnaarlugit, uumasutut ajoqutaasutut, soorlu tulukkatut terianniatullu, piniarneqarsinnaalertariaqartut.

Illuatungaanilu arfernik takornariartitsineq aatsaat taama nuannarineqartigisoq takornariaqarnermut sullissisut oqaatigaat.

Finn Siegstadip takornariaqarnermik suliallip, Ilulissani World of Greenlandimeersup arferit taama isigineqarnerat isumaqatiginngilaa. Taassuma aalisartut naammagittaalliuutaat paasisinnaanerarpai.

- Kisianni assersuutigalugu teriannissanut pullat aqquserngup qeqqanut ilineqarpat, taava terianniaq biilinit aportilluni toqussaaq. Taamatuttaaq qipoqqaat imaani inuupput, aamma piaaralutik bundgaarninik aserorterineq ajorput.

Arferit toqunngikkaluarlugit inuussutigineqarsinnaasut Finn Siegstadip erseqqissarusuppaa.

Aalisarnermut, Piniarnermut Nunalerinermullu Naalakkersuisup Finn Karlsen-ip, qipoqqanik qulinik pisassiisoqarnissaanik qinnuteqaataa pillugu Finn Siegstad ima isumaqarpoq:

- Arferit qulit inuussutigissallugit naammanngillat takornariaqarnerullu arferit massakkorpiaq inuussutigisinnavai, Finn Siegstad oqarpoq.