Ukiuni 19-ni aatsaat taama Kalaallit Nunaat arfattassinneqartigaaq.
IWC-mi arfattassat ilaneqarput! Taama qulequtserlugu tassataavannguaq Aalisarnermik Piniarnermillu Pisortaqarfimmi pisortaq Amalie Jessen nalunaarpoq.
-Pingajussaaninngooq iluatsittarpoq! Arfattassanut piumasaqaatigut pingajussaa allanngortillugu iluatsippoq. Konsensus - tassa taasisitsisaqattaarnani akuersineq iluatsinngimmat, taasissutigitikkatsigu, taaseqataasinnaasut 72-t, akornanni tapersiisut: 41-upput, akerliusut 11-ullutik. Taaseqataanngitsut 16-upput. Taamaalilluni 3/4-imik amerlanerussuteqartussaaneq anguneqartoq Amalie Jessen qujasaavoq.
Arfanniarneq pillugu ataatsimiititaliarsuup IWC-p ullormi ataatsimiiffiani kingullermi taamaalillutik kalaallinut makku pisassanngorput: Kitaanut:
Tikaagulliit 200-t (aappaagu nalilersoqqitassat), tikaagulliusaat 19-t aamma arfiviit marluk (aappaagu nalilersoqqillugit - piniarneq 2009-mi aallartillugu.
Ukiuni 69-ni siullerpaajusumik nunarput arfivinnik ukiumut marlunnik pisassinneqarpoq, pisassiissutit aatsaat 2009-mi atuutilissammata ukioq taanna sisamat pisarineqarsinnaassapput, tamatuma kingorna ukiumut marluk pisarineqarsinnaassallutik.
Arfiviit ukiuni 69-ni nunatsinni pisarineqarnikuunngillat, arfiviit angisoorsuummata pisaqartalernissamut sakkut atorneqarnissaannut piumasaqaatit sakkortuut aamma malinneqartussaasut, Amalie Jessen oqarpoq.
Tunumullu pisassiissutigineqarput tikaagulliit 12-t. Nunarput taamaalilluni tikaagulinnik 212-nik pisassinneqarpoq.
Akuerineqarnissamut killiliussaq taasinernik marlunnik qaangilaarlugu nunarput piumasaqaamminut akuersaarneqarpoq. Ilaatigut Amerika Kujallermiut akerliugaluartut takornariartitsinermut malittarisassaannut kalaallit allannguilaarlutik tapersersuinermikkut Amerika Kujallermiut marluk taaseqataanngitsoortillugit akuerineqarnissaq anguneqarpoq.
Amalie Jessen oqarpoq, ajoraluartumik qipoqqarnik ukiormanna pisassinneqanngitsoorlutik.
- Aaappaagu misileqqissavarput Ilisimatuussutsikkut Ataatsimiititaliap paasissutissat nutaat nalilersoreerpagit, Piniarnermut pisortaqarfimmi pisortaq Amalie Jessen oqarpoq.
