Arfanniut Norgimi kiviteriaraluarpaat
- Ventilit arfanniutip naqqaniittut arlaata peersimavaat, angallammilli piginnittup tamanna qujanartumik paasivaa, arfanniullu qaqinneqarpoq, Midtre Hålogalandimi Politeeqarfimmeersoq, Grete Birkeland, Norgimi nutaarsiassaqartitsivimmut NTB-mut oqarpoq, nangillunilu:
- Suli tigusarisaqanngilavut, politiilli misissuillutik aallartereerput.
Arfanniutip kivisinneqariaraluarnera avatangiisit pillugit Norgimi suliniaqatigiiffinnit assuarlerneqarpoq. Suliniaqatigiiffiit kattuffiisa ilaat, tassa Bellona, aamma Natur og Ungdom, isumaqarput, arfanniummik akornusersuineq avatangiisinik illersuiniarnermut attuumassuteqanngitsoq.
Arfanniut alla ukiup ataatsip matuma siorna aamma ajortumeeriarneqarpoq.
Iluanaarniutigalugu arfanniarneq Islandimiit Norgimiillu massakkut taamaallaat akuerisaavoq, arferilli ilisimatusarnerinnarmut Japanip atortarpai, kisianni neqaat neriniartarfinnut pisiniarfinnullu kingusinnerusukkut tunineqartarput.
