Takornarissat qipoqqarnik piniartunik naammattuuigunik sakkortuumik qisuariarsinnaapput, allaat takornariaqarneq innarlerlugu. Taamaammat tamanna sillimaffigaarput, inuttagut takornarissanik angallassinitsinni sunilluunniit piniaqqusaanngillat.
- Ilaasa sakkortoorujummik tigusinnaasarpaat, taamaammat inuttagut ilitsersuuttarpagut angallassitillutik piniassanngiivittut, tusagassiutit aqqutigalugit tamakku siaruapallassinnaasarmata tusaamaneqarnitsinnullu innarliisinnaallutik. Frederik Sandgreen Discolinemi pisortaq oqarpoq.
Takornarissallu piumassuserinngisaminnik arfannianik isiginnaarnissaasa pinaveersaartinnissaat ajornartorsiutaasinnaassangatinneqanngilaq.
- Radio angallatit radioat inuttatta tusarnaartarpaat, piniartoqalissagaluarpallu ingalassiasarpaat.
- Maannakkut ajornartorsiuterujuttut oqaatigisinnaanngilara soorunami siunissami qanoq ikkumaarnersoq massakkut oqaatigisinnaanngilara.
Frederik Sandgreen oqarpoq.
Qeqertarsuarmi takornariartitsisartut Lyngmark Tours ukiorpaalunngulersuni takornarianik arfernut takornariartitsisarput, taakkulu piniartunik pitsaanerusumik suleqateqarsinnaanermik ujartuipput.
Pisortaat Jens Salling ima oqarpoq.
- Nunarput annertungaarmat sinerissap qanittuani illoqarfiillu killingini taamaallaat arfernik isiginnaariartitsisarpugut.
- Iluarsiisoqarsinnaappallu illoqarfiit qanittuaninngaanniit ungavarlugu qipoqqarnik piniarsinnaaneq aalajangerlugu taava ajornartorsiutissatut kimilluunniit isigineqarsinaanngilaq, Jens Salling oqarpoq.