Arfanniarnissamut malittarisassat saqqummersinneqarput
Arfanniarneq pillugu ataatsimiititaliarsuup Kalaallit Nunaannut qulingiluanik qipoqqartassinneqarnerata kingorna marlunnik nutartikkanik nalunaarusiornissaq pisariaqalersimavoq.
Arfivinniarneq aamma sukateriffigineqarpoq, arfivimmi upernaaq pisarineqarmat neqaata 30 procentia asuliinnarpoq.
Arfernik angisuunik illersuinissamut piniarnissamullu malittarisassat nalunaarutip aappaani aalajangersarneqarput.
Qipoqqaat qulingiluat tassani ilanngunneqarput, arfivinniarnermut tunngasut sukatiallanneqarput, pilaffinnik toqqaanermi malittarisassat ersarissarneqarlutik, arferup saanikuinik pinngortitami saliinermi malittarisassat ersarissarneqarlutik taavalu arfanniarnerup akornusersorneqannginnissaa eqqarsaatigalugu arfernik takornariartitsinermut tunngatillugu kommunimi ileqqoreqqusaliorsinnaanermut inatsisitigut periarfissiisoqarluni.
Nalunaarusiap nutartikkap aappaani arfernik angisuunik pisanik nalunaaruteqartarneq ersarissarneqarpoq, aamma pissataqarnermi nalunaartussaatitaaneq.
Kalaallit Nunaanni Kommunit Kattuffiat, KANUKOKA, aamma Kalaallit Nunaanni Aalisartut Piniartullu Kattuffiat, KNAPK, suleqatigalugit Aalisarnermut Piniarnermullu Naalakkersuisoqarfiup nalunaarutit kukkunersiorpai.
Qipoqqarniarneq aggustip ulluisa 13-ianni siusinnerpaamik aallartissinnaavoq, tassa kommunit sumiiffinni KNAPK-p immikkoortortai peqatigalugit qipoqqartassiissutinik kommunini ataasiakkaani agguaassisoqareerpat.
