Arfanniarneq pillugu isumaqatigiinniarnerit pillugit Danmark ilungersorpoq

Arfanniarneq pillugu isumaqatigiinniartoqaleraangat Danmarkip nammineq peqataasarsinnaanissani anguniarniarpaa, naak isumaqatigiinniarsinnaanissamut piginnaatitaaneq EU-p nammineq tigummerusukkaluaraa, nunat EU-mut ilaasortaasut malittarisassaat nutaat EU-p taamaalilluni isumaqatigiinniassutigisassammagit.

Nunanut allanut ministerit sapaatip akunnerata uuma ingerlanerani ataatsimiilerpata, Danmark taasinermi itigartitaariaannaavoq. Taamaattoqassappalli, Maastricktimi immikkut piumasaqaat, nunanut allanut Danmarkimi ministerip, Per Stig Møllerip, sakkuginiarpaa, isumaqatigiissummi tassani allassimavoq, nunat imarsuup akianiittut nunap ilaasortaasup nammineq politikkikkut isumaqatigiinniassussinnaanissai isumagisinnaagai.

- Iliuusissamik allamik nassaarsinnaanngikkuta, isumaqatigiissummi immikkut piumasaq taanna atussavarput. Naalagaaffeqatigiittut imaluunniit Danmarkimiitutut iliorsinnaatitaanersugut tassani pineqarpoq, Europa pillugu Folketingip ataatsimiititaliaa ataatsimiimmat Per Stig Møller oqarpoq.

Nunanut EU-mut ilaasortaasunut EU-p kisimi isumaqatigiinniartalernissamik anguniagaqarneranik naalakkersuisut itigartitsinerat Folketingimi ilaasortat amerlanerussuteqartut tapersersorpaat. Kalaallit Nunaanni Savalimmiunilu pissutsit aamma tunngavilersuutigineqarlutik.

- Kalaallit Nunaat Savalimmiullu namminersornerulerunik namminneq isumaqatigiinniarsinnaasariaqarput, Socialdemokratit EU-mi oqaaseqartartuat, Svend Auken, oqarpoq.

Savalimmiut Kalaallit Nunaallu EU-mut ilaasortaanngillat. Arfanniarneq nunat taakku Danmarkimut sanilliullutik akuersaarneruvaat.

Arfanniarneq pillugu EU-p kisimi isumaqatigiinniartarnissaa nunat EU-mut ilaasortaasut sinnerisa ajoriffissaqartinngilaat, februaarimilu ataatsimiittoqarmat Danmark avinngarusimangaatsiartoq erserpoq.