Arfanniarneq oqallissutaaleraluarpoq
- Aporfigiuarsimavarput danskit tunngaviusumik inatsisaanni aalajangersagaq paragraf 19. Tassani allaqqavoq kunngi nunanut allanut tunngasuni kisimi oqartussaasoq. Kunngi sinnerlugu danskit naalakkersuisui oqartussaaffimmik tigumminnipput, Johan Lund Olsen aallartippoq.
Danskit isumalioqatigiissitami inatsit pineqartoq innersuussutigiuartarsimavaat, taamaattumillu kalaallinut anginerusumik angusaqarnissaq ajornakusuulaarsimalluni.
- Pingaartumik nunanut allanut sillimaniarnermullu apeqqutit eqqartorneqartillugit angusaqarnissaq killeqartarpoq, oqarpoq.
Arfanniartarneq Katuami ullumi aamma oqallisaaleraluaqaaq.
- Ajornartorsiut ersersineqartoq tassaavoq danskit naalakkersuisuisa uagut peqatigaluta isumaqatigiinniarnissamut piginnaatinneqareeraluarlutik pisinnaatitsissummik aallanngortitsisarnerat. Johan Lund Olsen aallartippoq.
Arfanniarneq pillugu ataatsimiititaliarsuup ataatsimiinnissaanut atatillugu imartamik arfanniarfigeqqusaanngitsumik pilersitsinissamut kalaallit naaggaaqqusigaluartut folketingimi ilaasortat amerlanerussuteqartut angerput, taamaalillutik taasinissaq allanngortillugu.
- Danskit oqartussaasuini qinikkat folketingimi ikinnerussuteqaleraangata uagut tusaaneeruttarpugut, uffa uagut kulturitsinnut ilaalluinnartumik arfanniartuusugut, erseqqissaavoq.
Nunarput namminiilivippat imaluunniit immikkut naalagaaffinngorpat oqartussaaffik tamakkiisoq aatsaat qulakkeerneqarsinnaassasoraa.
- Suli tassunga killinngilagut, kisianni maannamut angusarineqartut ajoriinnagassaanngillat. Assersuutigiinnarlugu erngup nukinganik nukissiuuteqalereerpugut, amerlanernillu sanaartorniarluta. Apeqqutini taamaattuni tamakkiisumik oqartussaaffigisatsinni naalakkersuisuvut pisinnaatinneqarput soorlu Canadami nukissiuuteqarnermit ministerimik, Danmarki akuliutiteqqaanngikkaluarlugu isumaqatigiinniarsinnaanissamut isumaqatigiissuteqarsinnaanissamullu, nunanut allanut tunngasunik ullumi saqqummiussaqartoq oqarpoq.
Johan Lund Olsenip pitsaaqutitut taavai pisuussutit uumaatsut pillugit isumaqatigiissut, Kalaallit Nunaata aningaasanik millionilikkaanik isertitsissutigiligassaatut naatsorsuutigisaq, aamma kalaallit inuiattut akuerineqarnerata pisinnaatitaaffinnik amerlanernik ammaassisussanngornera.
Sanngeequtaasoraali nunanut allanut sillimaniarnermullu apeqqut suli Danmarkip oqartussaaffigisaa.
