Arfannerit pingasut unioqqutitsinerupput

Arfanniarneq massakkorpiaq aallunneqartorujussuuvoq – ima ingasatsigisumik, allaat arfattat pillugit suliat pingasut politiinut anngunneqarlutik.

Unioqqutitsisumik Qasigiannguani marloriarluni arfattoqarsimanera politiinut nalunaarutigineqarsimavoq. Tikaagulliusaaq ataaseq unioqqutitsinikkut qoorortuumik pissanneqarsimavoq. Politiinut nalunaarutigineqartup aappaa tikaagulliusaamut aamma tunngavoq. Tikaagulliusaaq imaani tissukartoq naammattorneqarpoq, qiporaanillu annikitsunnguaannarmik peersisoqarsimavoq. Neqaata sinnera attorneqarsimanngilaq – angisuunik arfanniarnissamut peqqussutit taamaalillutik erseqqivissumik unioqqutinneqarsimallutik.

Pisut taakku pissutigalugit Qasigiannguani arfanniarneq Aalisarnermut Piniarnermullu Pisortaqarfimmit unitsinneqarallarpoq – arfanniarnerli unitsinneqavissanersoq Naalakkersuisut suli aalajangiiffiginngilaat. Aalisarnermut Piniarnermullu allaffimmi pisortaq, Ole Heinrich, taama ilisimatitsivoq.

Uummannami aamma unioqqutitsisumik arfattoqarsimavoq. Qilalugaq qaqortaq taavani pisarineqarsimavoq – naak qilalugartassiissutit suli agguaanneqanngikkaluartut.

Pisoq politiinut nalunaarutigineqareerpoq.

Qilalukkap neqaa Uummannami pisortat suliffeqarfiutaannut agguaanneqareerpoq, unalu pisarineqartoq Uummannami qilalugartassanit ilanngaatigineqarumaarpoq, Aalisarnermut Piniarnermullu Pisortaqarfimmi allaffimmi pisortaq, Ole Heinrich, ilisimatitsivoq.