Arctic Winter Gamesimut bilitsit piumaneqarluassangatippaat
- Ingammik ammaanersiorluni naggataarnersiorlunilu aaqqissuussinissat nuannarineqartorujussuunissaat naatsorsuutigaarput, soorluttaaq kulturikkut unnussiuaartitsinissanut angisuunut marluusunut bilitsit piffissap sivisunngitsup ingerlanerani nungunnissaat naatsorsuutigaarput. Aaqqissuussinerimmi taamaattut timersornernik aaqqissuussisarnernit nalinginnaasunit Arctic Winter Gamesip allaanerussutigai, Heidi Yang oqarpoq.
Arctic Winter Games pisorpassuaqarfiusartoq, Canadami nunap immikkoortuani Albertami, Grande Prairiemi aappaagu marsimi pissaaq. Aaqqissuisut naatsorsuutigaat 2.000-it missaanniittut unammiuaarnerni peqataajartussasut.
Nunatta peqataatitaqarnissaa Nunatsinni Timersoqatigiit Kattuffiata naatsorsuutigaa, tamatumalu saniatigut peqataassallutik Alaska, Nunavik, Nunavut aamma Saamit Nunaat.
Yellowknifemi siorna Arctic Winter Gamesimi Nunarput 44-nik ulunnappoq - kuultit aqqaneq-marluk, siilvit 14-it aamma bronzit 18-it. Nunatsinniit angusarissaarfiunerusut tassaapput sulorarneq nerrivimmilu arsaararneq.
Nunatsinni Timersoqatigiit Kattuffiata Arctic Winter Gamesimi Nunatsinnit kulturikkut aaqqissuussinernik isumaginnittooqqullugu NAPA qinnuigisimavaa.
NAPA ilaatigut annertuumik isiginnaagassiorniarpoq, ilaatigut Nunatsinni erinarsoqatigiit erinarsortarnerannik aamma Afrikap kujataamiuisa erinarsoqatigiittarnerannik ataatsimoortitsilluni takutitassiaasumik.
