Arctic Winter Games soqutigaat
Iqaluit Nuullu Issittumi nunallit unammiuaaqatigiinnerannik aaqqissuisuuneq 2002-mi avippaat. Iqaluit namminneq 2020-mi aaqqissuisuunissaat pillugu neqerooruteqartoqassasoq, Iqalunni kommunalbestyrelsip aalajangeqqammerpaa.
Unammiuaaqatigiinnernik aaqqissuisuunissaq pillugu pisortatigoortumik neqeroorut, Arctic Winter Gamesip qullersaqarfianut Nunavummiit apuussisoqarnissaa maanna suliniutigineqaleruttortoq, Iqalunni timersornermik aqutsisoqarfiup akisussaasuata Amy Elgersmap CBC Newsimut oqaatigaa.
Unammiuaarnerit nalaanni pisussanik aqutsisussanik ataatsimiititaliortoqassaaq. Iqaluit namminneerlutik aaqqissuisuusinnaanerannik, Arctic Winter Gamesip qullersaanut, takutinniartussaassavaat, naak Iqaluit 7.000-it missaannaannik inoqaraluartoq.
Timersortartut 1.500-t missaat, sungiusaasullu aqutsisullu aamma taama amerlatigisut isiginnaariallu Iqalunnukarnissaat ilimagineqarpoq.
Unammiuaaqatigiinnerni unammiuaarfissat Iqaluit pigereerpaat, soorlu ishockey-rtarfissat, illullu iluani arsaattarfiit assigisaallu.
Kulturikkullu pikialaarfissanik pilersitsiortortoqarnissaa aamma anguniarneqarpoq.
Iqaluit Nuuk peqatigalugu 2002-mi Arctic Winter Gamesimik aaqqissuisuuvoq, namminnerlu aaqqissuisuunissamut ajukkutinngilluinnarput.
Issittumi nunallit unammiuaarnerat Canadami nunap immikkoortuani Yukonimi illoqarfimmi Whitehorse-imi ukioq manna marsip ulluisa sisamaanniit qulingata tungaanut ingerlanneqassapput.
Timersortartut, sungiusaasut, aqutsisullu katillugit 130-t missaat Kalaallit Nunaanniit peqataassapput.