Arctic Winter Games pillugu isumaqatigiissusiorput
Nuummi Arctic Winter Games-eqarnissaa sapaammi unnukkut Whitehorse-mi atsioqatigiissutigineqarpoq. Kultureqarnermut Naalakkersuisoq Mimi Karlsen, Kommuneqarfik Sermersuumi 1. viceborgmester Per Berthelsen aamma Arctic Winter Gamesip nunani tamalaani ataatsimiititaliaani siulittaasoq Gerry Thick isumaqatigiissummik atsiortuupput.
Isumaqatigiissutigineqarpoq sukuutsernermi unamminert Iqalunni ingerlanneqassasut. Taamaasilluni sukuutsertarfimmik Nuummi sanasoqarnissaa pinngitsoorneqarsinnaavoq, naak tamanna Arctic Winter Gamesip nunani tamalaani ataatsimiititaliaata inassutigisimagaluaraa.
Arctic Winter Games-eqartarnerani Amerikap avannaamiut sunniutilerujussuupput taakkulu ishockey sukuutsernermilu unammeriaatsit allat pingaartittorujussuuaat. Taamaammat Arctic Winter Games-mi nunani tamalaani ataatsimiititaliap inassutigisimagaluarpaa Nuummi sukuutsertarfimmik timersortarfiliortoqassasoq. Maannali tassa Iqalummiut sukuutsernermik unamminernik aaqqissuisuuniarlutik akuersereersimapput. Taamaakkaluartoq peqataasussat tamarmik Nuummi ammaanersiornermi peqataassapput.
- Kisianni sukuutsertarfik pillugu allatut Kalaallit Nunaanni isummertoqassappat aaqqissuussisuunissamik isumaqatigiissut allanngortissinnaakutsoorparput, Gerry Thick KNR-imut oqarpoq.