Arctic Winter Games-imut piareersarput
Pissanngatigineqarpoq kingullermik Arctic Winter Games-eqarneratut nunarput ikinnerpaamik 49-nik ujaminnassanersoq.
Nunarput sinnerlugu unammiartortut, aqutsisut, sungiusaasut kulturimillu takutitsisussat 130-ussapput unammersuarnerit Yukon-imi Whitehorse-mi Alaskap ungasinngisaani ingerlanneqalerpata.
Timersuutit ujamminik pissarsilluartartut ilagaat nerrivimmi arsaararneq. Maanna kattuffiup nalunaarutigai Arctic Winter Games-imut unammiartortussat. Taakkulu ukuupput:
Aka Møller, K-33 Qaqortoq
Pilutaq Poulsen, NAPA-86 Atammik
Maren Jensen, NNAP Nuuk
Naduk Serubabelsen, NNAP Nuuk
Miki Pars Markussen, NNAP Nuuk
Marco Jørgensen Fisker, K-33 Qaqortoq
Manumina Poulsen, NAPA-86 Atammik
Janni Steenholdt, NBK-88 Niaqornaarsuk
Paarlatsissamaatinik aamma toqqaasoqarpoq toqqagaasut arlaat pisinnaajunnaassagaluarpat peqataasussanik. Tassaapput Ivik Knudsen, K-33 Qaqortoq aamma Nukannguaq Søholm ABC Aasianniit meeqqani angajullerni, nukarliillu paarlatsissamataat tassaapput Steffen Møller, K-33 Qaqortoq aamma Sikkersoq Petersen NBK Niaqornaarsuk.
Timersuutit allat unammiartortitassaat novembarip ingerlanerani toqqarneqassapput. Sisoraatinik oqilaniuttussat toqqarneqassapput novembarip naanerani Sisimiut Winter Games ingerlanneqareerpat. Sangusaartartut aamma peqataassapput kingullermilli angusat tunngavigalugit peqataasussat affaannanngortinneqarput aqqaneq marluusaraluartut arfininngortinneqarlutik.
Inuussuttut volleyball-imi pissartanngorniunnerat sapaatip akunnerata naanerani pissaaq. Tassani nukappissat kisimik unammissapput nivissani iligiit ataasiinnaat nalunaarsimammata. Inuusuttut pissartanngorniunnerat spaat novembarip arfernat naammasissaaq taassumalu kinguninngua Arctic Winter Games-eriartussat toqqarneqassapput.
Illup iluani arsaannermi nunarput sinnerlugu unammissapput iligiit pingasut. Tassa nukappissat iligiit marluk niviarsissallu iligiit ataatsit. Kisianni toqqaannginnermi sungiusaqatigiittoqassanngilaq. Iligiinni taakkunani pingasuni peqataasussat toqqarneqassapput klubbit inassutaat tunngavigalugit. Sungiusaasuussapput Kent Kielsen, Bent Petersen aamma Rene Olsen.
Sulorartartut aamma nunarput sinnerlugu ujaminnalluartarput. Taakku novembarip ingerlanerani toqqarneqassapput.
Inuit timersuutaat Arctic Sports aamma eqqillit timersuutaat Dene Games nunatsinniit aamma peqataaffigineqassapput. Timersuutini taakkunani nunatsinni pissartanngorniunnerit novembarip qeqqani pissapput tamatumalu kinguninnguaq Arctic Winter Games-eriartussat toqqarneqassapput.
Arctic Winter Games 2012 ingerlanneqassaaq martsip sisamaaniit qulingata tungaanut. Peqataasussat nunat tassaapput: Alaska, Yukon, Northwest Territories, Alberta North, Nunavut, Kalaallit Nunaat, Yamal Ruslandimiit, Nunavik Quebec kiisalu Saamit Skandinaviameersut.
