Arctic Winter Games Alaskami ingerlanneqassamaalerpoq
Arctic Winter Gamesip nunani tamalaani kommitea aalajangerpoq Alaskami illoqarfik Fairbanks 2014-imi issittormiut unammiuaarnerannik aaqqissuisuussasoq.
Taamaasilluni aappassaa Fairbanks Arctic Winter Gamesimik aaqqissuisussanngorpoq siullermik 1982-imi aaqqissuisuummat peqataasut sakkutooqarfimmi najugaqartinneqarlutik. Maanna tassa illoqarfik taanna 32.000-it sinnerlugit inulik Arctic Winter Gamesimik 2014-imi aaqqissuisussanngorpoq.
Arctic Winter Gamesip nunani tamalaani kommiteata siulitaasua Gerry Thick nalunaarpoq ilimagineqartoq timersortartut kulturimillu suliallit 2.000-it missaat 2014-imi peqataajumaartut.
Tullianik 2012-imi Arctic Winter Gameseqalerpat tamanna illoqarfimmi Whitehorsemi Yukonimiittumi ingerlanneqassaaq. Nuuk Naalakkersuisullu suleqatigillutik siumut ilimasaarereerput Nuuk 2016-imi aaqqissuisuunissaminut pilerisuttoq.
Arctic Winter Games siullerpaamik Nuummi ingerlanneqarpoq 2002-mi taamanikkut unammersuarnerit Nunavummi Iqalunni aamma Nuummi ingerlanneqarlutik. 2016-imi siullerpaamik aaqqissuussaq tamarmi Nuummi ingerlanneqassaaq.