Arctic Winter Games 2020 nutaamik iliuuseqartoq

Suiaqatiminoortartut, Arctic Winter Gamesimi, Canadami Whitehorsemit ukioq manna aaqqissuunneqartussami peqataasut, Pride Housemik taallugu siullerpaamik ornittagaqartinneqassapput.
Timersornermik unammiuaarnerit allat Pride Housemik peqartalernikuupput, Arctic Winter Gamesimilu siullerpaamik taamaattoqalissalluni. Assi © : Tradlands/Flickr
Allattoq Marianne Stenbæk, Montreal, Canada
januaarip 29-at 2020 10:21
Nutserisoq Mads Lynge

Timersornermik unammiuaarnerit allat Pride Housemik peqartalernikuupput, Arctic Winter Gamesimilu siullerpaamik taamaattoqalissalluni.

Vancouverimi ukiuunerani 2010-mi OL-ertoqarmat Canadami Pride Housemik siullerpaamik ammaasoqarpoq.

Canadap immikkoortuani Yukon Territoriesimi illoqarfimmi Whitehorsemi ukioq manna Arctic Winter Gameseqassaaq, suiaqatiminnoortartullu isumannaatsumik orniguffigisinnaasassaannik Pride Houseqassaaq.

Yukonimi suiaqatiminoortartut peqatigiiffiata Queer Yukonip Whitehorsemi Pride Housemik aaqqissuisuussapput. CBC News taama allaaserisaqarpoq.

Timersortartut inuusuttut isumannaatsumik ornittagaqarsinnaanissaat qulakkeerniarlugu Pride Housemik pilersitsisut, Sofia Fortin, Pride Housemik aaqqissuisut ilaata CBC Newsimut oqaatigaa.

Inuusuttut assersuutigalugu nunaqarfinneersut Pride Housemut ornigussinnaanissaat pingaaruteqartoq, Sofia Fortinip oqaatigaa, nunaqarfimmiummi ilaasa Pride Housetut ittumik immaqa orniguffissaqarneq ajormata.

Whitehorsemi ukioq manna marsip ulluisa 15-iannit 21-ata tungaanut Arctic Winter Gamesertoqassaaq, timersortartullu 75-it nunatsinniit peqataassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq