Arctic Umiaq Line ilaatigut akissummini allaapoq arsaattartut angalanissaannik aaqqissuisartut aaqqissuillaqqinnerusariaqartut, soorlu siusinaarlutik inniminniisarlutik, imaanngitsoq ullut pingasut sioqqullugit inniminniillutik, taama ilaatigut allappoq Arctic Umiaq Linemi pisortaq Jette Larsen.
- Illoqarfimmi sorlermi pissartanngorniuttoqarnissaa nalunnginneqareertarpoq, piffissarlu sioqqullugu inniminniisoqarsinnaavoq, paasigaannili bilitsit atunngitsoortariaqassasut taava utertiinnarneqarsinnaapput, tassa taama ajornanngitsigaaq, Jette Larsen oqarpoq.
Taanna isumaqarpoq GBU tassa arsaattartut kattuffiat Arctic Umiaq Line-mik suleqatiginnilluarnerusariaqartoq.
- Timersoqatigiit kattuffiannik suleqatiginnilluartarpugut, taamatuttaaq kattuffiit allat suleqatigilluartarpavut taakku sioqqutsillutik inniminniisarput aamma unamminerit qaqugukkut aallartissinnaanerinik isumasioqatigiittarpugut, taamaattumik GBU aamma siusinaartumik pilersaarusiortaqqunaqaaq, Jette Larsen oqarpoq.