Arctic Umiaq Line januaarimi oqqussiniarpoq
Juullikkunni Kitaani sinersortaatinik angalasussat januaarip sapaatip akunnera siulleq ilanngullugu angallanneqarsinnaanngorput, Arctic Umiaq Linep siulersuisui ippassaq taama aalajangiipput.
AUL-imi angallannermut pisortaq, Jette Larsen, ullumi ima oqarpoq:
- Naatsumik oqaatigalugu Januaarimi februaarimilu siusinnerpaamik inniminneereersimasut saaffigiortorneranni paasivarput amerlanerit timmisartumut ilaanissaminnut akitigut periarfissaqanngitsut.
Ilaasussat ilinniartortaqaalupput.
- Pakatsisimasut amerlalaartorujussuupput tamannalu pillugu nalilersueqqippugut sinersorneq aapaagu unittussaagaluartoq, kisianni januaarip aallaqqaataani unissagutta decembarimi ilaasussat ikilissammata januaari aallartereersoq oqquttariaqarpagut, Jette Larsen oqarpoq.
Jette Larsen aamma oqarpoq januaarip aallaqqaataani angallassinissamik aalajangerneq aamma pissuteqartoq 2005-imi ilaasut amerlassusiisa maannamut naammagisimaarneqarnerannik, taamalu billetsit akii allanngortinnagit umiarsuillu marluk atorlugit Sisimiunit Qaqortumut Kujataanilu angallassineqarsinnaalluni.
Jette Larsen aamma oqarpoq ukioq manna juullimut angallatassatik qangarnit amerlanerusussaasut, 100-llu missaanniittut timmisartumik uternissaminnut innimiisimarpaluttut, aamma oqaatigaa juullikkunni umiarsuit ulikkaaqqajuaannassasut, pinerit tamaasa 200-nit 250-inut ilaasoqartarlutik.
