Arctic Umiaq Line immikkut aningaasaliiffigaat

Umiarsuaatileqatigiiffik Arctic Umiaq Line immikkut ittumik 4,3 millioni koruuninik inatsisartut aningaasaqarnermut ataatsimiitiliaannit aningaasalliiffigineqarpoq, aviisi Sermitsiaq ullumi saqqummersoq taama allaaserisaqarpoq
Allattoq Jaaku Lyberth
maajip 14-at 2010 10:36

Umiarsuaatileqatigiiffik 2,5 millioni koruuninik siornatigut tapiffigineqarpoq. Taakku immikkullu ittumik tapiissutit katillugit Arctic Umiaq Line 6,8 millioni koruuninik tapiiffigineqarpoq. Arctic Umiaq Line Air Greenlandimit aammalu Royal Arctic Line-mit pigineqarpoq, 40-nik sulisoqarluni inuttat ilanngullugit. Umiarsuaatileqatigiiffiup angallatituaa Sarfaq Ittuk 2010-p naanissaata tungaanut angalassaaq, tamatumalu kingornagut umiarsuaatileqatigiiffiup Arctic Umiaq Linep siunissaa qanoq issanersoq suli ilisimaneqanngilaq.

Nuna tamakkerlugu angallanikkut pilersaarut assartuussinermut ataatsimiitaliamit suliarineqartoq politikerinit utaqqineqarpoq.

Sarfaq Ittuup siunissaa ataatsimiititaliamit misissorneqartussaavoq, unali qulakkeerlugu ilisimaneqarpoq, umiarsuaatileqatigiiffik pisortanit tapiiffigineqarani ingerlasinnaanngilaq.

Assartuussinermut ataatsimiititaliap nalunaarusiaata aggustip qaammataani naammassineqarnissaa naatsorsuutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq