Arctic Travel Groupip Arctic Umiaq Line misissorpaa
Arctic Umiaq Line nalunngisatsitut tunisassanngorpoq. Suliffiutileqatigiit pisisussatut piukkussat Arctic Travel Group direktøriat maana Kalaallit Nunaanniippoq.
Tamaaniinnermini misissorpaa Arctic Umiaq Line qanoq naleqarnersoq.
Aammalu, immaqa pingaarnerusumik, paasiniarlugu Arctic Umiaq Linep sortai aningaasatigut annaasaqarfiunngitsumik ingerlanneqarsinnaanersut. Aningaasanillu annaasaqaataasussat atorunnaartitaassapput .
ATG-lli direktøriata Thorkild Videbækip atorunnaarsitaasussat sorpiaanersut oqaatigiumanngilai.
-Naamik oqaatigisinnaanngikkallarpakka, angerlarluta naatsorsueqqaartariaqarpugut, maanna nassuiareerparput suna eqqarsaatigalugu, kisianni tamatta immikkut ajornartorsiutitut isigisavut misissorluaqqaartariaqarpavut, piffissarlu aggersoq taakkununnga atortariaqarlugu qaammatip 14-ata tungaanut, taava taamanikkut Namminersornerullutik Oqartussat neqeroorfigineqarumaarput, ATG-p direktøria oqarpoq.