Arctic Green Foodip pisortarisimasai eqqartuussivimmut suliassanngortinneqartut
Aalisarnermut, Piniarnermut Nunalerinermullu Naalakkersuisoqarfiup Nuna Advokatit Nuummiittut qinnuigisimavai ingerlatsivik eqqartuussisunut sassarteqqullugu.
Nuna Advokatit nalunaarusiami allapput, Arctic Green Foodip aqutsisui akisussaasuusut ingerlatsiviup tapiissutit akiliisinnaajunnaanngilaatsiarluni akiitsunik matussusiinernut atuisimaneranut.
- Ingerlatsiviup iluani pissutsit pillugit inatsisitigut peqqissaartumik nalilersuisitsisimavugut. Isumaqarpugut nalornisiginagu Arctic Green Foodimi aqutsisut taamaaliortussaanatik ilisimallugaluarlugu taamaaliorsimasut. Tamanna tunngavigalugu eqqartuussisutigut akisussaassuseq inissikkusussimavarput, pisortaq Jørgen Isak Olsen Naalakkersuisoqarfimmeersoq oqarpoq.
Suliamut atasumik Nuna Advokatit siusinnerusukkut ingerlatsivik piumaffigisimavaa 3,5 millioner koruunit Arctic Green Foodip suleqatigisaaniit Greenland Propertiesimit uterteqqullugit.
Tamatumunnga pissutaavoq ullut qulingiluat ingerlanerinnaanni Arctic Green Food aningaasat pisuussutillu allat 3,5 millioner koruuninik nalillit suleqatigisaminut nussorsimammagit. Suleqatigisaa illuutinik suliffeqarfinnillu piginnittoq 2011-mi pilersinneqarpoq.
Taamatut akiliinerup ingerlatsiviit taakku marluk akornanni akiitsut annikillisippai. Soorlu Arctic Green Foodip suleqammi Grønlandsbankimut akiitsui akilersimagai. Soorlu aamma Greenland Properties assangiarsunnik 708.000 koruunit nalinginut akilerneqarsimasoq.
