Arctic Green Food pillugu ataatsimiinnissaq kinguartinneqarpoq

NAQQITAQ:Inatsisartut aningaasaqarnermut ataatsimititaliaa Arctic Green Food pillugu ullumi ataatsimiittussaagaluarpoq, ataatsimiinnissarli kinguartinneqarpoq.
Allattoq Mads Lynge
januaarip 14-at 2009 17:21

Ataatsimiititaliap siulittaasua Augusta Salling taama nalunaaruteqarpoq.

Namminersornerullutik Oqartussanut kiffartuussinissamut isumaqatigiissut februaarip aallaqqaataani atorunnaartussaanera ataatsimiissutigineqartussaagaluarpoq.

Namminersornerullutik Oqartussat aningaasaliissutigisartagaat 17 millioni koruuniugaluarput, aningaasanulli inatsimmi 2009-moortumut aningaasaliissutit appartinneqarput 8 millioni koruuniinnanngortinneqarlutik.

Aningaasaliissutinik appaasoqarneratigut tunitsiviit qulit matuneqartariaqassasut, Arctic Green Foodimi siulersuisut siulittaasuat Charles Kastberg oqarpoq.

Taassuma aamma oqaatigaa Arctic Green Foodip naalakkersuisullu akornanni maanna isumaqatigiinniartoqaleruttortoq, tamannalu pillugu annerusumik oqaaseqarsinnaannginnerarluni.

Kiffartuussinissamik isumaqatigiissut februaarip aallaqqaataani atorunnaartussaavoq, taamaalitinnagulu aaqqiisoqartariaqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq