Arctic Green Food: Namminersornerullutik Oqartussat eqqartuussisunut tunniussinnaavavut

Taama pisoqariaannaavoq Inatsisartut Aningaasaqarnermut ataatsimiititaliaata suliffeqarfik ilisimateqqaarnagu, nioqqutissiorfinnik ingerlatsineranut akiliutitik millerujussuarniarmatigik. Aamma Arctic Green Foodip Namminersornerullutik Oqartussat kiffartuussinissamik isumaqatigiissummik unioqqutitsinerarlugit eqqartuussisunut tunniussinnaavai. Arctic Green Foodip pisortaanut Tønnes Berthelsenimut susoqarnersoq apeqqutigaarput:

- Arctic Green Foodip ingerlatai pillugit Namminersornerusullu isumaqatigiinniarnikuuvugut. Taamanikkullu kisitsisit isumaqatigiissutigisavut aallaavigalugit suliffeqarfimmik pilersitsivugut, ilaatigut sulisut piginneqataaffigisaanik. Kisitsisit taamanikkut aallaavigisavut maanna allanngorujussuarput, taamanikkut oqaatigineqartut affaaluunniit maannakkut inulerpaat, Tønnes Berthelsen oqarpoq.

Taanna aperineqarami Inatsisartut aningaasaqarnermut ataatsimiititaliaanit attavigineqarsimanersut, oqarpoq attavigiuminaatsorujussuusut. Saqqummiiffigerusullugit saaffigisaraluarpavut qisuariarfigineqarnerli ajorpugut.

Isumaqatigiissutip atorunnaarsinneqarnera qanoq kinguneqassanersoq aperineqarami Tønnes Berthelsen oqarpoq, suliffeqarfiup amigartoorujussuarneranik kinguneqassasoq, tamatumalu kinguneranit tunisassiorfiit qulingiluaasut nunaqarfinni illoqarfinnilu mikinerusuni ingerlanneqartut matuneqartariaqassasut, taamalu sulisut suliffissaarutissallutik aamma piniartut aalisartullu tunitsivissaarutissallutik.

- Suliffeqarfik ingerlaqqissappat Namminersornerullutik Oqartussat aningaasaliissutitik aaqqiitariaqarpaat, Tønnes Berthelsen oqarpoq oqaatigalugulu aningaasaliissutit aaqqinneqanngippata periarfissatut kingullertut Namminersornerullutik Oqartussat eqqartuussisunut tunniuttariaqassallugit.