Nunaqarfinni tunitsiviit tunisassiorfiilluunniit matuneqartariaqartarnerinut atatillugu ajornartorsiutit Arctic Green Foodip septembarip ulluisa 19-ianni ataatsimiinnermi oqallisigissavaat.
Narsarmiini tunisassiorfik kingulliulluni matuneqarpoq.
Arctic Green Foodimi siulersuisut siulittaasuat, Simon Olsen, naapertorlugu, tunisassiorfiit tunitsivilluunniit akilersinnaanersut sinneqartoortarnersullu paasiniarneqartariaqarpoq.
- Suliffeqarfiit mikisunnguit pinngitsooratik akilersinnaasariaqarput, taamaammat misileraanissaq pisariaqarpoq, tunisassiorsinnaanermut periarfissanik nutaanik aamma ujaasisariaqarluni, Simon Olsen oqarpoq.
Nunaqarfinni amerlanerpaani tunitsiveqarluniluunniit tunisassiorfeqarnissaa Arctic Green Foodip anguniagaraa.