Arctic Cirle Race sakkortuumik anorlernera pissutigalugu taamaatinneqarpoq
Ujakkaarfiusumi sakkortuumik anorlerpoq,
Sapaammi anorlerneranit Sisimiut timaanni 160 kilometerinut ingerlaarnerup ullormut immikkoortortaata ingerlanneqarfigisassaani -40 gradinik issittutut misinnarpoq.
Ujakkaarnermik aaqqissuisunit oqaaseqartartoq Mads Nordlund taamaatitsiinnarneq pillugu Sermitsiaq.AG-mut ima oqarpoq:
- Perserneranik isikkiveqannginneranillu kingunilimmik anorlernera pissutigalugu taamaatitsiinnarnissamik aalajangerneq eqqortuuvoq. Ingerlaannartoqarsimagaluarpat tamanna inuunermik navianartorsiorfiusimassagaluarpoq. Ippassaq pujornera pissutigalugu aamma isikkivilulluinnarpoq, kisianni ullumi aputip, persernerata anorillu kinguneranik ingerlaarnissaq ajornarluinnarpoq, Mads Nordlund oqarpoq.
Peqataasut tamarmik ajoratik utersimalersut aqutsisunit oqaatigineqarpoq, taamaattorli atortut ilarpaalussui assersuutigalugu toqqit anorersuarnerata kinguneranik annaaneqarsimallutik.
Aaqqissuisut neriorsuipput ujaminnatsitsineq ingerlanneqassasoq, kisiannili silarlunnera pissutigalugu tamanna ataasinngornermi unnukkumut kinguartinneqartoq.
Sapaammi taamaatitsisariaqalernerup kinguneranik ujammit tallimanngornermi arfininngornermilu angusat tamarmiusut tunngavigalugit tunniussuunneqassapput, Mads Nordlund ACR-imeersoq oqarpoq.
