Arctic Circle Race-imut peqataasussat Sisimiunut tikeraleruttorput
Sisimiunut siorna apuunniarneq ilaatigut silamik peqquteqartumik ajornakusoorsimavoq.
Sisoraatinik arpaliunnersuarmut peqataasussatut allatsissimapput 90-it. Taakkulu ippassaq unnukkut ilisimatitseqatigiinnermut naapipput. Ukiormanna ingerlaarfissaat siullermeerluni Sisimiut kangiatungaaniinnani avannaatatungaaniissaaq.
ACR-imik aaqqissuisut peqataasussanut ilisimatitsissutigaat, ingerlaarfimminni tuttunik toqungasunik siumuisinnaanerat.
Tuttut toqungasut marluk ingerlaarfissamiittut takuneqarsimapput. Taakkulu ukiorluunerata kingunerisaanik toqusimanerat nassuiaatigineqassaaq, Laust Løgstrup taama ilisimatitsivoq.
Arctic Circle Race-imut peqataasussat ippassaq tikittut ilagaat 47-nik ukiulik Boris Romanov Ruslandimeersoq, immikkut illuinnartumik peqquteqarluni peqataasoq.
- ACR ukiut arfineq-marluk matuma siornagut tusaqqaarpara, taamani qatanngutigalu peqataassalluta pileritsappugut. Qatanngutigali angut siorna toquvoq, taannalu eqqaaniarlugu ukiormanna peqataavunga, Boris Romanov Arctic Circle Race-p nittartagaanut oqarpoq.
Arctic Circle Race-imi ukiormanna qulequtaritinneqarpoq ”Kulturi, silap pissusaa ataqqeqatigiinnerlu”.
Qulequttamut atatillugu Aqqaluk Lynge, ICC-meersoq peqataasussanut Kulturip illorsuani Taseralimmi unnugu oqalugiassaaq.
ACR-ip nittartagaa acr.gl ullormut arlaleriarluni nutaarsiassanik assitalinnik immerneqartarpoq.