Arctic Circle Race aallartippoq

Sisoraatinik oqilaniuttartut 80-it nunanit assigiinngitsunit aqqaneq-marlunneersut ullaap tungaa Sisimiuni Arctic Circle Race aallartinneqarmat peqataapput.

Peqataasut aallanngitsiarnerini borgmester Hermann Berthelsenimit Arctic Circle Race-komité-milu siulittaasumit Elisabeth Ringstedimit tikilluaqquneqarput ullullu pingasut ingerlaarnissaanni ingerlalluarnissaannik kissaanneqarlutik.

Sisimiormiut ilarpassui unammisussat aallarnissaannut pisarneq malillugu ussagarsimapput.

Inuit 1.500-t missaasa unammisussat 80-usut 160 kilometerimik takissusilimmik, sisoraatinik arpattussat, nunarsuarmi unammiffiit sakkortunersaannik taaneqartartumi ingerlalluarnissaannik kissaassiartorsimapput.

Arctic Circle Race ukiormanna qulissaanik ingerlanneqarpoq, unammersuarnermilu pisortaasoq, Laust Løgstrup, naapertorlugu aaqqissuunneqartarnera aappaagumiit allanngortinneqassagunarpoq.

Tassami Arctic Circle Race 2008 allatut takissuseqarlunilu allami ingerlanniarneqarmat, tamatumunnga patsisaavoq, unammiffissap ukiuni kingullerni aputaasattarnerujussua.

KNR-ip nittartagaani sisoraatinik arpannermit ullumi videoliat takuneqarsinnaapput.