Issittumi inuiaat ersinartulersaarusiaat filmiliariniaraat
Suliniullu taanna pillugu Norgep avannaani Kautokeinomi marsimi workshopertitsisoqassaaq.
Film.gl-imi tamanna atuarneqarsinnaavoq.
Filmiliornermik Nunatsinni aallutaqartut Film.gl tamanna pillugu Saamit filmiliornermik institutiat, Canadamilu York University suleqatiserivaat, Issittumi inuiaat ersinartulersaarusiaat filmiliarinialerlugit, nangeqattaartussianngortinnialerlugu "Arctic Chills"-imillu taallugu.
Nangeqattaartuliaq qulinik immikkoortortaqassaaq, immikkoortullu ataasiakkaat Issittumi nunani tamalaani filmiliortartunit suliarineqassapput.
Suliniut "Arctic Chills" York Universityp suliniutaanit "Mobilizing Inuit Cultural Heritage"-imit aningaasalersorneqassaaq, filmiliortartut Issittumeersut Kautokeinomi marsimi naapeqatigiinnissaannut aningaasaliisoqassalluni.
Filmiliornermi ilitsersuisut Nunatsinneersut, manuskriptiliortartut, isiginnaartitsisartut oqaluttuallaqqissullu februaarip aallaqqaataatinnagu qinnuteqarnissaannut kajumissaarneqarput, angalaneq, najugaqarneq nerisaqarnerillu aningaasaliiffigineqarnissaannut qinnuteqartoqarsinnaalluni.
Qinnuteqarnissamut piumasaqaatit Film.gl-imi alakkarterneqarsinnaapput.