Arabiamiut naalagaaffii peqataarusunnersut nalornissutigineqarpoq

Libyami qaartartumeereqattaarnerit Arabiamiut illersoqatigiiffianni allattaanermit aamma isornartorsiorneqarput. Taamatuttaaq Arabiamiut naalagaaffiisa Libyap qanittuaniittut siuttuisa Libyamut qaartartunik saassussineq toqqissisimanngissutigaat.

Saassusseqattaarnerit aallartimmata 2003-mi Irakimut saassussisoqarneranit pisut allaaneroqaat; Arabiamiut siutuisa arlaannaannilluunniit qisuariartoqanngilaq, sulilu oqaaseqartoqarani. Libyamut qaartartunik igeriusseqattaarnerit Arabiamiunit aqqusinermi naapitassaasunit isornartorsiorneqanngillat akerliussutsimillu takutitsisoqarani. Arabiami Emiratineersut timmisartuutitik Sardiniami upalungaarsimatippai Qatarimeersullu aamma ornigutilerlutik. Kisianni tassa Saudi Arabiameersoqanngilaq, Jordanimeersoqarani Egyptenimeersoqaranilu. Jodanimilu aviisit saqqaanni allassimavoq; Nunat killiit Libyamik saassusseqqissamaarput - naak ullut marlussuit matuma siorna namminneq Pariisimi atsioqataanermikkut akuersaaqataallutik.

Arabiamiut siuttui immaqa naalanneqarnissartik ilimaginagu saassussinissamut inatsigaluarsimapput - maannalu nunat tamat saassussimmata immaqa pakasarneqarlutik. Taamaalillutillu maannakkut pisunut akisussaaqataaput, maannakkulli innuttaasunit tapersersorneqaraluarlutik sapaatip akunnerata tulliani immaqa tapersersorneqarunnaarsinnaapput tullianilu qinersisoqalerpat tunuartitaariaannaallutik. Taamaammat oqaaseqarnaveersaarput. Taakkununnga ilaavoq Arabiamiut illersoqatigiiffianni allattaaneq, Egyptenimioq Amar Moussa, ungasinngitsukkut Præsidentinngorniunissami qineqqusaangajalerami isumakulunneraannarallartoq.