Araba Kaffit nagguteeqqallu Københavnimi pisiarineqarsinnaalersut
Frida Waaben ilinniarnertuunngorniarlunili Danmarkimut nuuppoq. Kalaallillu nioqqutissaataannik pisisinnaaneq taamanerniilli maqaasilerpaa. Taamaammat Københavnimi Amager Boulevardimi pisiniarfimmik Inuittenimik atsikkaminik ammaavoq.
- Danmarkimi kalaallit nioqqutissaataannik peqarnissaa maqaasiinnarpara, KNR-imut oqarpoq.
- Kalaaliunera tulluusimaarutigisorujussuuvara. Taamaammat Nunatsinni suliarineqartartorpassuarnik danskinut takutitserusuppunga, Frida Waaben oqarpoq.
Inuittenimi Araba Kaffit, nagguteeqqat, Inuit Quality Clothesimit atisat, Inuacare-imit nioqqutissat, marriukkat nioqqutissallu allat Nunatsinneersut pisiarineqarsinnaapput. Frida Waabenillu nioqqutissat amerlanerusut siunissami tuniniarsinnaalernissaat aamma neriuutigalugulu naatsorsuutigaa.
- Ballonngit, erfalasut, nalliuttorsiornermilu atortut allat aallarniutigaakka. Kalaalerpassuarnik aallarniisunik atisaliortartunillu pikkorissoqartoq pisiniarfinni takutikkusuppara, Frida Waaben oqarpoq.