Aqutsinermik immikkut ilisimasalik: Søren Eriksen aqutsillaqqissuuvoq

Naalagaaffiup qimuttuitsuutileqatigiivini DSB-mi pisortaanertut ukiuni tallimani sulereerluni Søren Eriksen siorna upernaakkut soraarsitaavoq, DSB-p ataani inissisimasumut DSBFirstimut atatillugu mamianartuliamut atatillugu soraarsitaagami. Soraarsitsineq Danmarkip angallannermut taamanikkut ministerianit Hans Christian Schmidtimit kajumissaarutaasimasoq ilaatigut oqaatigineqartarpoq.

Eqqartuussissuserisut misissuereersullu Søren Eriksen DSBFirstip ajalusoorneranut pissutaasimanngitsoq paasineqarpoq.

Søren Eriksenili pisuutitaajunnaavippa? Kalaallit Nunaanilu atorfininnera Danmarkimi kingusinnerusukkut atorfinissinnaanissaanut iluaqutissaannartut nalilerneqarsinnaava? Ilami Danmarkimi suliffeqarfissuit annersaasa ilaannit soraarsitaanikugami.

- Søren Eriksenip pisuutitaasinnaannginneranut suliffeqarfissuarnik aqutsinermik ilisimasallit tamangajalluinnarmik isumaqatigigaat ilimagaara. Maannamulli atorfigisimasamini taama pitsaatigisumik inissisimaannarsimanngilaq, tassami soraarsitaasimavoq. Tusaamasaanerlutaaneranilli oqalunnerit maanna qatangiinnartinneqarsimasutut nalilerneqarsinnaapput. Danmarkimili atorfineqqikkaluarpat oqallittoqalissagaluarpoq, suliffeqarfiilli tamanna tusaarusussanngikkaluarpaat, pikkorissuuneralu pingaartinnerussagaluarlugu, Anders Drejer, aqutsinermik immikkut ilisimasalik, inuussutissarsiutillu pillugit naliliisartoq Aalborgip Universitetianeersoq oqarpoq.

Tele Greenlandilli pisortaanertaava qanoq pikkoritsigiva?

- Søren Eriksen aqutsisuullaqqissuuvoq, assigiinngitsutigullu tamanna takutittarsimallugu. Naalagaaffiup qimuttuitsuutileqatigiivini DSB-mi aqutsisooqqammerpoq, pikkorissuuninilu matumani takutillugu. Isumalluartitsilerpoq, sulisut sulerusussuseqalerput, nutaaliorlunilu. Ajoraluartumilli soraarsitaavoq, inuillu aperigaanni oqartarput Søren Eriksen piginnaanikittutut nalilerneqarani politikkikkut soraarsitaasoq. Taamaammat isumaqarpunga Kalaallit Nunaat aqutsisuullaqqissumik atorfinitsitsisimasoq, Anders Drejer, oqarpoq.

Søren Eriksenip Tele Greenlandimik ineriartortitsisinnaallunilu sulianik naammassiuminarsaasinnaassusia pissutaalluni, Tele Greenlandimi siulersuisunit toqqarneqartoq, sapaatip-akunnerata siuliani nalunaarutigineqarpoq.

Tamakkuali angussagunigit suut piumasaqaataappat? Tele Greenland pisortanit tamakkiisumik pigineqarmat, politikkikkut anguniakkat tusaaniaqqaartariaqassavai.

- Suliniutinik nutaanik aallarniiniaruni politikkikkut aalajangiisussat tusaaniaqqaartariaqassavai, suliniutigineqarniartussammi akuerineqaqqaartussaapput. Taamaaliunngikkunimi oqaasissaqarluartutut nalilerneqarnavianngilaq. Kisianni isumaqarpunga Søren Eriksen piginnaaneqarluartoq, aqutsinermik immikkut ilisimasalik Aalborgip Universitetianeersoq oqarpoq.

Søren Eriksen Tele Greenmlandimi pisortaanertut aasaru sulilissaaq.