Aqumiut isumaqatigiissusiorput
Taamaalilluni aqumiut peqatigiiffianni ilaasortat 400-it 500-jullu akornanniittut soorlu kilisaatini naalakkat, aquttut, igasut, inuttat allallu, Atorfillit Kattuffiannut ilaasortaasinnaalerlutik.
- Umiarsuarni inuttat kattuffinnut ulloq manna tikillugu ataatsimoorfeqanngillat tamannalu pissutigalu aningaasarsiatigut isumaqatigiissutinik peqaratik, Atorfillit Kattuffianni siulittaasoq, Dina Olsen aamma KAP-ip siulittaasua, Saxtorph Didriksen tusagassiuutinut nalunaarummini allapput.
Taakkulu maanna suliassaasa tullerilerpaat, kilisaatini inuttat sullivimminni atugassarissaarnerulernissaa anguniarlugu isumaqatigiissusiornissaq.
AK-p KAP-illu siulittaasui aamma allapput, kilisaatini inuttat ataasiakkaat Atorfillit Kattuffianni, Kilisaatini Aqumiut Kattuffianni imaluunniit SIK-mi ilaasortaasinnaaneri pillugit maanna misissuisoqaleruttortoq.
