Aqqusinikkut angallanneq misissuiffiginerusalerniarpaat
Angallannermik misissuinerit paasisitsiniaanerup annerusup, politiinit aallartinneqalersup ilaannaraa. Paasisitsiniaanikkut aqqusinikkut angallannermi malittarisassat nutaat innuttaasunut eqqaasitsissutiginiarneqarput.
- Aqqusinerni angallannerni takusinnaavarput, ilaasa isumannaallisaanermut ujatsiutaasaq suli puigortaraat. Kisiannimi ileqqutoqqat allanngortinniarnerat sivisusinnaasarpoq, taamaattumik inatsisip allannguutai erseqqissaqqissallugit pisariaqarpoq, politimesterip tullia Morten Nielsen oqarpoq.
Aqqusinikkut angallanermi inatsit nutaaq siorna oktobarip aallaqqaataani atuutilerpoq. Tassani allannguutit pingaarnerit tassaallutik pinngitsoorani isumannaallisaanermut ujatsiutaasaqartussaaneq aamma meeqqat isumannaatsumik issiaveqarlutillu ujatsiutaasaqartussaapput. Qulliit ingerlaartilluni aamma ikumatinneqartussaapput, aamma imigassartorsimanermut killissarititaasoq 0,8 promillemit 0,5 promillemut appartinneqarpoq.
Aamma qamuteralannik ingerlatsinissamut nutaanik malittarisassaqalerpoq. Tassa pingaarnertut niaqorortinnaveeqquteqarnissaq piumasaqaataalerpoq, ingerlatsisinnaasullu ukiui 16-iniit 18-inut qaffanneqarput.