Aqqusinerni angallattunik nakkutilliisut appisaluunneqarput
Unioqqutitsisunut akiliisitsissutit 50 procentimik appariarsimapput.
Naalagaaffimmi pissutsinut ministerip, Alfredo Pérez Rubalcabap, tamanna naammaginngilluinnarpaa:
- Inatsit pisarnissitut atorteqqilerniarsiuk, ministeri tusagassiortunik katersortitsinermi kaammattuivoq.
Aqqusinikkut angallattunik nakkutilliisut Spaniap aningaasaqarniarnikkut ilungersuanartorsiorneranit eqqugaaqqapput:
Taakku qaammammut 12.000 koruuniinnarnik akissarsiaqarput, taakkulu aningaasarsiornikkut ajornartorsiornerup nalaani procentinik tallimanik appartinneqarsimapput.
Orsussaq sipaarniarlugu biilitik uninngatiinnarlugit nakkutilliissasut peqquneqarsimapput; oqarasuaatit akisoqisut aamma atoqqusaanngilaat, radiotik kisiisa.
Tamakkulu tassa akerleralugit akiliisitsissutinik unioqqutitsisunut tunniussiumajunnaarput:
- Pingaarnerit salliutiinnarpavut, soorlu biilertut ikiorlugit, aqqusinikkut angallattunik nakkutilliisut oqaaseqartartuat nassuiaavoq.
Akiliisitsissutinik tunniussiumajunnaarneq Spaniami naalagaaffiup aningaasiviata isertitaanik tooqqaannartumik eqquivoq, naalagaaffilli akiniaalluni aqqusinikkut angallattunik nakkutilliisut akiliisitsissutinik amerlanerpaanik agguaassisimasunut akissarsisitsisalerpoq.
Akiliisitsissutit tunniunneqartarunnaaraluarmata aqqusinikkut ajunaarnerit amerlerianngillat. Spaniami aqqusinikkut ajunaartut aasaq-manna tupinnaannartumik ikittunnguupput.
