Aqqusinerni angallattunik misissuinerit 2009-mi amerlanerulissapput

Politimester Steen Thomsen pilersaarutit pillugit ima nassuiaavoq:

- Aqqusinerni angallannermut nutaamik inatsiseqalerneranut atatillugu ukiortaamiit aqqusinermi angallattunik misissuinerusalerniarpugut, Steen Thomsen oqarpoq.

Tamatuma saniatigut politiit aaqqissuussaanerminnik allanngortitsiniarput, taannalu 2010-p aallartilaarnerani piareerniarneqarpoq. Allannguutaasussat Steen Thomsenip ima oqaatigai:

- Kalaallit Nunaat tamakkerlugu qitiusumi pigaartartoqalissaagut, nunap immikkoortuini politeeqarfinnik pingaarnernik taakkualu ataani politeeqarfinnik minnerusunik peqalissaaq, Steen Thomsen oqarpoq.

Ulloq unnuarlu saaffiginnittarfissaq Nuummiissaaq. Tamannali nunatsinni innuttaasut annerusumik maluginavianngilaat.

Saaffiginnittarfimmili sulisut sungiussilluariarpata tamanna innuttaasunut iluaqutaalersinnaasoq, Steen Thomsenip oqaatigaa.

Tamakkua saniatigut 2009-mi politimestereqarfik allamut nuuttussaassaaq.

- Kalaallit Nunaanni politiit qullersaqarfiata allaffeqarfia allaffinnut nutaanut nutsertussaassaaq. Ullumikkullu Nuummi politiit politimestereqarfiullu allaffeqarfittut ataatsimoorussaat, Nuummi politiit tamakkerlugu atulissavaat.

- Kalaallit Nunaanni pisortat aaqqissuusseqqinnerit ingerlatileruttorpaat, soorlu kommunit akileraartarnerlu qiviaannarsinnaavavut. Taamattaaq aamma uagut aaqqissuusseqqinnertigut pitsanngorsaaniarsaraagut, Steen Thomsen oqarpoq.