Aqqusinermi angallattut misissorneqartut
Politiit misissuinerminni ilaatigut biilit aqqanillit meeqqanik qiterusersimanngitsunik ilaasullit unitsippaat.
Ilulissat politiivini ulluinnarni aqutsisoq, Karl Vinther, tupaallaqqavoq taama ajortigisumik Ilulissani inissisimasoqarmat:
- Angallannermut malittarisassat Ilulissani taama annertutigisumik malinneqannginnerat tupaallannarpoq, ingasammik meeqqat qiterusernissaat eqqarsaatigalugu, Karl Vinther Ilulissat politiivini ulluinnarni aqutsisoq oqarpoq.
Biilit misissuiffigineqartut arlallit assakaasui nungullarsimapput, biilillu ilaat suli ukiorsiutinik assakaasoqartiterlutik. Knallertinik ingerlaartut aamma misissuiffigineqarput, ilaatigut nasarsuaqaratik, forsikringeqaratik ataaserlu ilaasoqarluni ingerlaartoq unitsinneqarput.
Politiit Ilulissani misissuinertik sapaatip akunnera naallugu ingerlatissavaat.
