Aqquserngit isumasioqatigiissutigaat

Siunissami aqquserngiortarnissaq eqqarsaatigalugu oqallinneq, maannakkorpiaq Sisimiuni aqquserngiornermut ilisimasalinnit 100-nit peqataaffigineqartoq ingerlanneqarpoq.

Aqquserngiortarneq pillugu oqallinneq eqqumiigineqarsinnaagunaraluartoq, tamanna pisariaqartoq, Laust Løgstrup Sisimiuni oqallinnermi aqutsisuusoq oqarpoq.

Nunarpullu nunarsuarmi kisiartaalluni illoqarfinniit illoqarfinnut aqqusineqanngilaq:

- Nunatsinni aqqusinerpassuaqarpoq, taamaammallu aqquserngit pillugit isumasioqatigiinneq eqqumiigisassaanngilaq. Nunatsinniilli eqqumiigineqarsinnaasoq tassaavoq, illoqarfinniit illoqarfinnut aqquserngiortoqarsinnaanera. Nunani allani issittuni, illoqarfinniit illoqarfinnut aqqusineqartarpoq. Tamannalu pillugu isumasioqatigiisitsivugut, paasiniarlugu issittumi aqquserngiortarnerni suut misilittagarineqarnersut. Aqquserngiortarnermi nunatsinni aamma ilisimaneqartut paasiniarneqarput. Aqqusinerujussuit eqqarsaatigineqassappata, taava periarfissaasut taaneqarsinnaasut tassaapput Sisimiuniit Kangerlussuarmut aqquserngiorsinnaaneq, imaluunniit Qaqortumiit Narsarsuup tungaanut aqquserngiorsinnaaneq, Laust Løgstrup oqarpoq nangillunilu: - Aqqusinerujussuarnik pilersitsisinnaaneq ajornanngilaq, aalisarnerinnarmi eqqarsaatiginagu, illoqarfinniit illorarfinnut aqqusinikkut attaveqalersinnaaneq aamma eqqarsaatigineqartariaqalerpoq. Aqqusinernik pilersitsiortoraanni assersuutigalugu Sisimiuniit Kangerlussuarmut, taava soorlu umimmaateqarfiit angallasseriaannanngussapput, immaqalu aamma aatsitassiornermi alumiiniuiorfissat eqqarsaatitalugit qalluisoqalerpat, aqqusinerujussuaqarpallu, angallassinnaaneq ajornannginnerusoq pisinnaalissaaq. Aqquserngioraannimi periarfissat amerlaqaat, aqquserngioraannilu inuussutissarsiornermi siuarsaaneq inersiartornerlu pilissaaq, Laust Løgstrup naggasiilluni taama oqarpoq.

Taanna aamma oqarpoq, nunani avannarlerni aqqusinniornermut ilisimasallit ilisimasaat paasissallugit pingaaruteqartoq. Aqquserngit pillugit isumasioqatigiinneq Sisimiuni ingerlanneqartoq, ataasinngorpat naammassineqassaaq.